Geloofstoerusting

Hoe werk geloof?

2010-01-31T19:31:45.105+02:00

Lees Johannes 1:12: Neem Jesus aan, dit wil sê, aanvaar dat Jesus aan die kruis gesterf het sodat Friedolien 'n kind van God kan word.

Die Bybel gee vir ons 'n kort verduideliking van geloof. Die 1933-Vertaling sê: Die geloof is 'n vaste vertroue op die dinge wat ons hoop, 'n bewys van die inge wat ons nie sien nie (Hebreërs 11:1). In die 1983-vertaling staan in Hebreërs 11:1: "Om te glo, is om seker te wees van die dinge wat ons hoop, om oortuig te wees van die dinge wat ons nie sien nie." Die Lewende Bybel sê: "Wat beteken dit om op God te vertrou? Dit beteken om seker te wees dat die dinge waarna ons uitsien, wel sal gebeur. Dit beteken ook om oortuig te wees dat die dinge wat ons nie kan sien nie, wel daar is."

Die Heidelbergse Kategismus sê dat 'n ware geloof nie net 'n seker kennis is waardeur ek alles as waar neem wat God in sy Woord gesê het nie, maar dit is ook 'n vaste vertroue wat die Heilige Gees deur die evangelie in my hart werk dat vergewing van sonde nie net vir ander nie, maar ook aan my geskenk is. Daarom hou ek ook daaraan vas dat ek vir ewig voor God onskuldig verklaar is en dat ek die ewige geluk van God af sal kry, uit genade ter wille van wat Christus gedoen het om dit vir my te verdien.

Ons leer dus volgens die Woord van God dat geloof kennis en vertroue is.

1. Die kennis wat ons moet hê om te glo, is die boodskap van God se Woord, die Bybel. In Johannes 3:16 vind ons die samevatting van hierdie boodskap. Ons moet weet dat ons sondaars is, dat God ons liefhet, dat ons net na God toe moet vlug met ons skuld en sonde en dat Hy ons kan en wil vergewe.

2. Maar die tweede deel van geloof vol vertroue is ewe noodsaaklik. Dit beteken dat ek hierdie dinge vir myself sal toe-eien, sal aanvaar, sal vat: dat ek sal weet dat Christus ook vir my sonde aan die kruis betaal het. Hierdie vertroue-kant van die geloof is die werk van die Heilige Gees.

Verder praat ons ook van 'n werkende geloof. As iemand vir my iets gee, moet ek my hande uitsteek om dit te neem. Dit is soos wanneer iemand sy hand uitsteek met die palm na bo en sê: "So is geloof!" Wanneer hy sy hand omdraai met die palm na onder sê hy: "So is geloof nie!" Met ander woorde, ek moet God se geskenk neem, ek moet dit vat.

Maar geloof self verlos ons nie. Dit is maar net die "hand" waarmee ek my Verlossing uit die hand van God neem. Geloof is die band waarmee ek aan die Here verbind word. Dit is soos 'n man wat 'n R100.00-noot uithou en sê: "Ek gee dit vir jou as 'n geskenk. Kom, haal dit." Maar as jy dink dit is te goed om waar te wees en bly sit, is jy ongelowig. As jy opstaan en dit gaan haal, is dit geloof in aksie. Jy neem hom op sy woord.

Geloofsekerheid

2010-01-31T19:28:27.718+02:00

God kan nie leuentaal praat nie. Hy sê in die Bybel dat hy jou liefhet en jy moet dit glo. Neem byvoorbeeld Johannes 3:16 en skryf jou naam in waar "wêreld" en "elkeen" staan (jy is mos daarby ingesluit). God het die wêreld (. . . . . . . . . . . . .) so liefgehad dat Hy Sy enigste Seun gegee het sodat elkeen (. . . . . . . . . . . . .) wat in hom glo, nie verlore sal gaan nie maar die ewige lewe sal hê.

Lees ook Johannes 15:12, 16:27; Efesiërs 2:4-5; 5:2; Hebreërs 12:6; 1 Johannes 3:1 en 4:10,19.

As jy jou eie lewe ondersoek, sal jy baie bewyse van sy liefde vind in die seëninge wat jy geniet. Partykeer kan ons ons selfs in ons teleurstellings verbly. Iemand sê hy het blind geword. Hy kon dit nie verstaan nie. Dog deur sy blindheid het hy God begin soek en is sy siel gered. God het aan hom 'n onbeskryflike innerlike vreugde gegee. Hy het vrede in sy hart. Nou verbly hy hom in sy blindheid, want daardeur het hy God gevind.

Wees dus seker: God het jou lief net soos jy is. Sal jy sy liefde beantwoord deur te doen wat Hy in Openbaring 3:20 vra?

Die vrou in die amp

2010-01-31T19:25:51.110+02:00

Alhoewel die vrou dikwels 'n minderwaardige rol onder die Ou Testamentiese bedeling gespeel het, het God tog meermale van die vrou gebruik gemaak, onder andere Debora (in 'n leiersposisie) en Gulda, as profetes (2 Konings 22:14). Ook kan 'n mens aanvaar dat vroue wat in die Nuwe-Testamentiese tydperk oor die gawe van profesie beskik het, nie verhinder kon word om te preek nie.

In sommige Christelike kerke word die vrou wel in die besondere amp vestig, selfs as predikant. In ander kerke is die opvatting weer dat die vrou nie in die besondere amp mag dien nie, maar slegs as gelowige (amp van die gelowige) diens mag verrig. Sommige kerke stel slegs die amp van diaken vir die vrou oop. Hier in Suid-Afrika sowel as in Nederland is daar, veral die afgelope paar dekades, ernstig besin oor hierdie hele vraagstuk. Twee van die drie Afrikaanse Kerke het reeds vroue op die kansel. Diegene wat voel dat die vrou nie op die kansel hoort nie, beroep hulle onder andere op Skrifgedeeltes soos 1 Korintiërs 14:34 en 1 Timoteus 2:12 - tog word die vrou toegelaat om lerend op te tree by kategetiese onderrig en word sy in sekere kerke toegelaat om die Woord te verkondig - net nie op die kansel nie. U sien dus hoe groot die verwarring is en dat kerke nie altyd konsekwent optree nie. In die NG Kerk is al die ampte oop vir vroue. Dit is deur die Algemene Sinode so besluit en deur die Streeksinodes bekragtig.

Ek hoop dat u nou meer duidelikheid oor hierdie saak het.